زجلية بعنوان ( أنويت أنزور ) للشاعر إبراهيم احميجان

 

زجلية بعنوان ( أنويت أنزور )

للشاعر إبراهيم احميجان

...

انْويت انْزور زَرتْ

الشّمس احْمات

 نَاوي الرْواح

الجَّهدْ هذا

 

زرتْ الكبدة اللّي فْ القبر اْرشات

أو اتَّحْناتْ العظام اللّي فْ الذّات

حتى شماتْ ريحةْ الگمرة

اللّي ابقات ، ما خالفت عادة

 

فين قاصد يا بنادم

احْيوط بْلا خاوة

ما بين اهْنا ؤ الْهيه

شوق گادي

أحِّياني علْ الصّابي

إلا ملْ

واحّياني علْ الكبير

إلا أتّل

وحْداني بلا گامة

 

اسبق الفراق ريح الشّوم

أو طاب السبول

في فدّان الخاطر خاوي

سارت احكايْ أعمارةْ الوسم

منزلة بلا صابة

الضيف العراضة

كيف العادة ناوي يحضر

 

أتّحرجْ شيخ السربة من البرگي

لا يسولُ على أوتاد لوثاق

 مايو هذا والحدادة

 كيف العادة مزال ما بانُو

 

عضيت ظفري بْ سنِّيْ

ؤُ سرّحتْ ف الخاطر تَخْميمة

لقيت فيَّ جوج شَرْكَاتْ بَاسْلاَتْ 

الأولى اصْبر

 والثانية ما نحلف علْ الغدر

والثالثة عرتها من شبابي

 تبسيمة مَزَالة توقف القلم العَدَلْ

لاَيْ أزمم اعْليَّ اللّي ماهي

مكتوبة ليّ

ويحاسبني النهار اللّخر

عل الفرحة اللّي فيَّ

نكدة طايشة ، ضُرْ